గుర్రెవులలో సహకార కొనుగోలు కేంద్రం ప్రారంభం
ములుగు, ఏప్రిల్ 30, తెలంగాణ జ్యోతి: రైతులకు మద్దతుగా గుర్రెవుల గ్రామంలో పరస్పర సహాయ సహకార సంఘం ఆధ్వర్యంలో కొనుగోలు కేంద్రాన్ని సర్పంచులు జాడి రాంబాబు, సౌజన్యలు ప్రారంభించారు. ఈ కేంద్రం ద్వారా రైతులు తమ పంటలను నేరుగా విక్రయించుకునే సౌకర్యం పొందనున్నారు. ప్రారంభ కార్యక్రమంలో స్థానిక ప్రజాప్రతినిధులు, అధికారులు, రైతులు పాల్గొన్నారు. ఈ సందర్భంగా వారు మాట్లాడుతూ మధ్యవర్తుల జోక్యం లేకుండా రైతులకు న్యాయమైన ధర అందించడమే లక్ష్యమని తెలిపారు. ఈ కేంద్రంలో ధాన్యం సహా ఇతర పంటలను ప్రభుత్వం నిర్ణయించిన కనీస మద్దతు ధరకు కొనుగోలు చేయనున్నారు. రైతులు ఈ అవకాశాన్ని సద్వినియోగం చేసుకోవాలని అధికారులు సూచించారు. కొనుగోలు కేంద్రం ప్రారంభంతో పరిసర గ్రామాల రైతులకు రవాణా సౌకర్యం మెరుగుపడటంతో పాటు చెల్లింపులు త్వరగా అందే అవకాశముందని తెలిపారు. ఈ కార్యక్రమంలో ముప్పనపల్లి ఉప సర్పంచ్ శ్రీధర్ సుమన్, సత్యం, కొనుగోలు కేంద్రం ఇంచార్జి పూజారి వెంకటేష్, చిట్టం శ్రీనివాస్, మఠం వెంకటేష్, నరేష్ తదితరులు పాల్గొన్నారు.
