పోక్సో కేసులో నిందితునికి 20ఏళ్ల కారాగార శిక్ష
తీర్పు వెలువరించిన జిల్లా జడ్జి ఎస్.వీ.పీ.సూర్య చంద్రకళ
ములుగు ప్రతినిధి, ఆగస్టు 30, తెలంగాణ జ్యోతి : పోక్సో కేసులో ఓ నిందితునికి 20ఏళ్ల కారాగార శిక్ష (జీవిత ఖైదు) విధిస్తూ ములుగు జిల్లా కోర్టు ప్రధాన న్యాయమూర్తి ఎస్.వీ.పీ.సూర్య చంద్రకళ శనివారం తీర్పు వెలువరించారు. అందుకు సంబంధించిన వివరాలను జిల్లా ఎస్పీ డాక్టర్ పి.శబరీష్ మీడియాకు వెల్లడించారు. ఏటూరునాగారం మండలం ఎలిశెట్టివాయి గ్రామానికి చెందిన ఎండీ.గౌస్ పాషా 2022లో ఓ బాలికపై అత్యాచారం చేశాడు. అప్పటి ఏఎస్పీ, ప్రస్తుత జగిత్యాల ఎస్పీ అశోక్ కుమార్ నిందితున్ని అరెస్ట్ చేసి పోక్సో చట్టం కింద కేసు నమోదు చేసి దర్యాప్తు చేపట్టారు. శనివారం నిందితుడిపై కోర్టులో నేరం నిరూపణ కావడంతో జడ్జి సూర్య చంద్రకళ 20ఏళ్ల జైలు శిక్ష(జీవిత ఖైదు)తో పాటు రూ.3వేల జరిమానా విధిస్తూ తీర్పునిచ్చారు. కాగా, కేసులో విచారణ చేపట్టి నేరనిరూపణకు కృషి చేసిన జగిత్యాల ఎస్పీ అశోక్ కుమార్, ఎస్సై డి.రమేష్, సిబ్బందిని ములుగు ఎస్పీ శబరీష్ అభినందించారు.
