ఫోటోగ్రఫీ రంగానికి ఎస్కే షరీఫ్ మరణం తీరని లోటు
సీనియర్ ఫోటోగ్రాఫర్ కు ఘనంగా నివాళులు
వెంకటాపురం, నవంబర్ 15, తెలంగాణ జ్యోతి : ములుగు జిల్లా వెంకటాపురం మండల స్పందన ఫోటో & వీడియో గ్రాఫర్స్ యూనియన్ ఆధ్వర్యంలో శనివారం జరిగిన సమావేశంలో భద్రాచలం పట్టణానికి చెందిన ప్రముఖ సీనియర్ ఫోటోగ్రాఫర్, అనేక అవార్డులు అందుకున్న ఎస్.కే. షరీఫ్ ఆకస్మిక మరణంపై గాఢ సంతాపం వ్యక్తం చేశారు. దశాబ్దాల పాటు ఫోటోగ్రఫీ రంగంలో కళాత్మక క్షణాలను సృష్టిస్తూ, ప్రతి ఫ్రేమ్కు ప్రాణం పోసే నైపుణ్యంతో పేరుపొందిన ఆయన మరణం ఫోటోగ్రఫీ ప్రపంచానికి పెద్ద లోటు అని పేర్కొన్నారు. పెళ్లిళ్లు, శుభకార్యాలు, పండుగలు, సామాజిక కార్యక్రమాలలో ఏ సందర్భమైనా షరీఫ్ క్లిక్ చేసిన ప్రతి ఫోటో ఒక కథ చెబుతుందని అభిమానులు స్మరించారు. కొత్తగా ఫోటోగ్రఫీ నేర్చుకునే యువతకు గొప్ప గురువుగా నిలిచి, కెమెరా టెక్నిక్స్ నుంచి ఫ్రేమ్ సెట్టింగ్స్ వరకు తన అనుభవాన్ని ఎవరితోనైనా స్వేచ్ఛగా పంచుకునే మహానుభావుడని పేర్కొన్నారు. పేద కుటుంబాలకు ఉచిత సేవలు అందించడం, అవసరమైన వారికి కెమెరాలు ఇవ్వడం, ప్రోత్సాహక మాటలతో వారిని నిలబెట్టడం ఆయన మానవత్వానికి నిదర్శనమని గుర్తుచేశారు. షరీఫ్ కుటుంబానికి యూనియన్ అండదండగా ఉంటుందని తెలిపారు. ఈ కార్యక్రమంలో అధ్యక్షులు శ్రీరాముల సధశివరావు, రాగం సాంబ, చెన్నం రాజు, వంకాయల రాము, వేల్పుల కిశోర్, చిట్యాల రవీందర్, బంధ రవి తదితరులు పాల్గొని ఆయన సేవలను స్మరించారు. “ఆయన కెమెరా క్లిక్స్ ఇక వినిపించకపోయినా, ఆయన బంధించిన వేలాది భావోద్వేగ క్షణాలు ఎప్పటికీ ఆయనను గుర్తు చేస్తూనే ఉంటాయి” అని నిర్వాహకులు భావోద్వేగంతో తెలిపారు.
