జిల్లా కేంద్రంలో డివైడర్ ను ఢీకొట్టిన లారీ–తప్పిన ప్రమాదం
ములుగు ప్రతినిధి, జూలై 24, తెలంగాణ జ్యోతి : ములుగు జిల్లా కేంద్రంలోని బండారుపల్లి రోడ్డులో నూతనంగా నిర్మించిన డివైడర్ ను లోడ్ తో వెళ్తున్న లారీ బలంగా ఢీకొట్టింది. గురువారం తెల్లవారుజామున ఈ సంఘటన జరిగినట్లు స్థానికులు తెలిపారు. బండారుపల్లి నుంచి ములుగు వైపుకు వస్తున్న లారీ ఏకంగా డివైడర్ పైకి దూసుకుపోయింది. ఈ ప్రమాదంలో డ్రైవర్, క్లీనర్ కు ప్రాణాపాయం తప్పింది. స్వల్ప గాయాలతో బయటపడ్డారు. అయితే అదే సమయంలో మరో వాహనం వస్తే భారీ ప్రమాదం జరిగేదని స్థానికులు తెలిపారు. డ్రైవర్ నిద్రమత్తులో ఉండటంతోనే ఈ ప్రమాదం జరిగినట్లు భావిస్తున్నారు. విషయం తెలుసుకున్న పోలీసులు ఘటనా స్థలిని పరిశీలించి వివరాలు సేకరించారు. ట్రాఫిక్ కు ఇబ్బందులు లేకుండా లారీని తొలగించేందుకు చర్యలు చేపట్టారు. ప్రమాదాల నివారణకు డ్రైవర్లు రాత్రి సమయాల్లో అత్యంత జాగ్రత్త వహించాలని పోలీసులు సూచించారు.
